ასოციაცია HERA XXI-ის ბაზაზე 5 ახალგაზრდული ჯგუფი სექსუალური და რეპროდუქციული ჯანმრთელობისა და უფლებების მიმართულებით წარმატებით საქმიანობს საქართველოს სხვადასხვა მუნიციპალიტეტში: თბილისი, გორი, ქუთაისი, ნინოწმინდა, ახალქალაქი. ჯგუფები, თვითშემუშავებული სამოქმედო გეგმებით თვითონ განსაზღვრავენ მიზნებს, ამოცანებს, საქმიანობებს, და ამ გეგმების თანახმად ატარებენ სხვადასხვა ტიპის შეხვედრებსა და კამპანიებს.
ორგანიზაცია ორიენტირებულია თანაბარი პირობებისა და შესაძლებლობების შექმნაზე გენდერულად მრავალფეროვანი იდენტობის მქონე ახალგაზრდებისთვის. თითოეულ მუნიციპალიტეტს ასოციაცია HERA XXI-ის თანასწორ-განმანათლებლების, ლიდერების, მოხალისეებისა და აქტივისტების სახით ჰყავს თანამედროვე ცოდნით და უნარებით აღჭურვილი ადამიანური რესურსი, რაც ხელს უწყობს სამოქალაქო აქტივიზმის განვითარებას და წვდომას კეთილგანწყობილ ხარისხიან ჯანდაცვის სერვისებზე, რაც ეროვნულ დონეზე პასუხობს საქართველოს 2023-2026 წლების ახალგაზრდული პოლიტიკის სტრატეგიისა და 2023 წლის სამოქმედო გეგმის მეორე სტრატეგიულ ამოცანას: „ახალგაზრდების ჯანმრთელობისა და კეთილდღეობის გაძლიერება“.
ჰერა ოცდაერთის ახალგაზრდული ქსელი
ახალგაზრდული ჯგუფების მუშაობის მთავარი მიზანია, ხელი შეუწყოს ახალგაზრდების სრულფასოვანი განვითარებისათვის შესაბამისი გარემოს შექმნას, სადაც ახალგაზრდები შეძლებენ საკუთარი პოტენციალის სრულად რეალიზებასა და საზოგადოებრივი ცხოვრების ყველა სფეროში აქტიურად ჩართვას
ასოციაცია HERA XXI-ის ახალგაზრდული ჯგუფი
ასოციაცია “HERA XXI-ის” ბაზაზე ფუნქციონირებს ახალგაზრდული ჯგუფები თბილისში, სამცხე-ჯავახეთში (ახალციხე), იმერეთში (ქუთაისი) სამეგრელოს რეგიონში (ხობი) და წეროვანში (დევნილთა კომპაქტური დასახლება). ჯგუფების მიზანია, ხელი შეუწყოს ახალგაზრდების სრულფასოვანი განვითარებისათვის შესაბამისი გარემოს შექმნას, სადაც ახალგაზრდები შეძლებენ საკუთარი პოტენციალის სრულად რეალიზებასა და საზოგადოებრივი ცხოვრების ყველა სფეროში აქტიურად ჩართვას, ახალგაზრდების სრჯუ საკითხების წინ წამოწევას, რათა გაძლიერდეს ახალგაზრდების მონაწილეობა გადაწყვეტილების მიღების და იმპლემენტაციის პროცესში, როგორც ორგანიზაციის, ისე სახელმწიფო დონეზე. პროგრამის ფარგლებში შერჩეული აქტიური ახალგაზრდები ჩართული არიან ასოციაციის საქმიანობაში, სხვადასხვა ტიპის საინფორმაციო-საგანმანათლებლო თუ გასართობ-შემეცნებითი აქტივობების დაგეგმვისა და განხორციელების პროცესში.
თანასწორ-განმანათლებლები
თანასწორთა განათლება გულისხმობს საკუთარი თანასწორების/თანატოლების არაფორმალური განათლების პროცესს. იგი მიზნად ისახავს სამიზნე ჯგუფების ცოდნის, დამოკიდებულებების და უნარ-ჩვევების განვითარებას თანასწორების მეშვეობით, რადგან მათ ერთმანეთის მიმართ აქვთ ნდობა, საერთო ინტერესები, ენა და სოციალური მოთხოვნები. ასოციაცია “ჰერა ოცდაერთის” მიერ “თანასწორი-თანასწორს” მეთოდოლოგიით 600-მდე ახალგაზრდა გადამზადდა და ჩატარდა 5000-ზე მეტი საინფორმაციო-საგანმანათლებლო შეხვედრა თბილისის, იმერეთის, კახეთის, სამეგრელოს, სამცხე-ჯავახეთის, ქვემო ქართლის სოფლებსა და ქალაქებში მცხოვრები ახალგაზრდებისთვის. ასოციაცია ახალგაზრდების გადამზადებისთვის სხვადასხვა საგანმანათლებლო რესურსს იყენებს, მათ შორისაა სახელმძღვანელო „ყველაფერი ერთ სასწავლო კურსში“, რომელიც შემუშავდა UNAIDS-ის, WHO-ს, WAS-ის და UNESCO-ს სტანდარტების შესაბამისად.
